शिवसताक्षी : झापाको शिवसताक्षीमा जंगली हात्तीको आक्रमणबाट एक जनाको मृत्यु भएको छ । शिवसताक्षी–११ उत्तर रतुवा माई आयोजनाको बन क्षेत्रमा दाउरा खोज्न गएका स्थानीय ६० वर्षीय पवित्रा भेट्वालको जंगली हात्तीको आक्रमणबाट मृत्यु भएको हो ।
उनका श्रीमान दिलिप भेट्वाल सक्त घाइते भएका छन् । उनलाई उपचारका लागि विर्तामोड स्थित विर्तासिटी अस्पताल लगिएको छ । भेट्वाल दम्पत्ती आज दिउँसो दाउरा खोज्न गाउँसँगै जेडिएको नजिकैको वनमा गएका थिए ।
श्रीमान साइकलमा र श्रीमतीले डोकोमा दाउराको भारी हल्दै गर्दा आक्रमण गरेको स्थानीयले बताए । श्रीमतीलाई हात्तीले लछारपछार पारेपछि श्रीमान भाग्न सफल भएका थिए । श्रीमानलाई पनि हात्तीले आक्रमण गरेको छ । श्रीमान्को खुट्टा, अनुहारमा चोट रहेको स्थानीयको भनाइ छ ।
घटनास्थलमा इलाका प्रहरी झिलझिलेको टोलीले कानूनी प्रक्रया सुरु गरेको छ । घटनास्थल देखि नजिकै अझै पनि दुई वटा हात्ती रहेका छन् । स्थानीयका अनुसार दुई वटा जंगली हात्तीले आज साँझ ५ः५० मा आक्रमण गरेको थियो ।
