झापा,
रोटर्याक्ट क्लब अफ बिर्तामोडको आयोजनामा झापा गाउँपालिकास्थित नगर अस्पतालमा एक दिने ‘पाठेघर क्यान्सर सचेतना तथा स्क्रिनिङ कार्यक्रम’ गरिएको छ ।
आज सोमबार भएको कार्यक्रममा सयभन्दा बढी महिलाले निःशुल्क स्वास्थ्य परीक्षण तथा परामर्श सेवा लिएका थिए । पाठेघर क्यान्सरको प्रारम्भिक पहिचान र रोकथामका उपायबारे जानकारी दिँदै गरिएको स्क्रिनिङ कार्यक्रममा डा. सुरुची महतो, डा. शर्मिला रानपाल लगायतको चिकित्सक टोलीले सेवा प्रदान गरेको थियो ।
कार्यक्रममा महिलाहरूको नियमित स्वास्थ्य जाँचसँगै पाठेघर क्यान्सरका लक्षण, जोखिम र समयमै परीक्षणको महत्वबारे सचेतना दिइएको थियो । आयोजकका अनुसार ग्रामीण क्षेत्रका महिलाहरूलाई लक्षित गरी कार्यक्रम सञ्चालन गरिएको हो ।
कार्यक्रम रोटर्याक्ट क्लब अफ बिर्तामोडको संयोजनमा सम्पन्न भएको हो भने हिमालयन एरेष्ट इन्स्योरेन्स लिमिटेडले आर्थिक साझेदारको रूपमा सहयोग गरेको थियो । पुर्वाञ्चल क्यान्सर अस्पतालले प्राविधिक तथा चिकित्सकीय सहयोग उपलब्ध गराएको आयोजकले जनाएको छ ।
रोटर्याक्ट क्लबले यस्ता स्वास्थ्य सचेतना कार्यक्रम आगामी दिनमा पनि निरन्तर सञ्चालन गर्ने रोटर्याक्ट क्लब अफ बिर्तामोडका अध्यक्ष सुशील थापाले जानकारी दिए ।
