बिर्तामोड ३ स्थित बिर्ताबजारमा छठ पर्वको तयारी तिब्र पारिएको छ । बिर्ताबजारको अदुवा खोलामा छठ पर्वको तयारी अन्तिम चरणमा पुगेको आयोजक नेपाल मधेशी समाज सेवा समितिका रामेश्वर मण्डलले आज शनिबार सांझ पुजा स्थलमा आयोजित पत्रकार भेटघाटमा जानकारी दिए ।
उनले छठ घाट निर्माण कार्यलाई तीव्रता दिईएको र करिब ९० प्रतिशत कार्य सम्पन्न भईसकेको बताए । घाटमा पण्डाल निमार्ण, सरसफाई लगायतका काम अहिले धमाधम भइरहेको छ ।
उनका अनुसार छट घाट करिब ४ सय फिट लम्बाईको बनिसकेको छ । उनले यस वर्षको छठमा ब्रतालु र श्रद्धालु गरेर हजारौंले अवलोकन गर्ने अनुमान रहेको बताए ।
अदुवा खोलाको दुबै किनारमा गरि करीब २ सय बढी घाट निमार्ण गरिसकिएको आयोजक समितिका संयोजक संजयकुमार शर्माले जानकारी दिए । उनका अनुसार एउटा घाटको ५ सय रुपैंया सेवाशुल्क तोकिएको छ । शुल्क तिर्न नसक्ने बिपन्नकालागि भने निशुल्क पुजास्थल (घाट) उपलब्ध गराइने जनाइएको छ ।
पत्रकार भेटघाटमा आयोजक नेपाल मधेशी समाज सेवा समितिका सह–सचिव प्रकाश महत्तो, बरिष्ठ सल्लाहकार दिलिप सिंह, कोषाध्यक्ष कला राउत, सदस्य किशु शाहा, सदस्य मोहन झा, अमर पट्टेल लगायतको उपस्थिती रहेको थियो ।
केही वर्ष अघिसम्म पनि छठ तराईमा त्यो पनि मधेसी समुदाय र हिन्दु धर्मावलम्बीमा सीमित थियो। तर, पछिल्लो समय विभिन्न धर्म, समुदाय, जातजातिका मानिसहरुले सँगै बसेर मनाउन थालेपछि जिल्लामा रहेका बिभिन्न नदीनाला तालतलैयामा छठका बेला थामिनसक्नु भीड हुन्छ । छठको तयारीका लागि अदुवा खोलाको तट सिगारिन थालिएको छ अदुवा खोलामा प्राय सबै समुदाय एक आपसमा मिलेर बर्षौंदेखि भव्य रुपमा छठपर्व मनाउंदै आएका छन् ।
चार दिनसम्म मनाइने छठ पर्वको पहिलो दिन व्रतालुहरु नुहाएर अरबा अरबाइन भोजन गर्ने गर्दछन् भने दोश्रो दिन साँझ प्रसादको रुपमा चामल, सक्खर र दूध मिलाएर बनाएको खीर ग्रहण ग्रहण गरी खरना गर्दछन् ।
त्यस्तै तेश्रो दिन अस्ताउँदो सूर्यलाई अर्घ्य दिन तयार पारेको पूजा सामग्री घाटमा लगेर पूजा गर्ने गरिन्छ भने भने चौथो दिन बिहान उँदाउँदो सूर्यको अर्घ्य दिएपछि छठपर्वको विधिवत समापन हुन्छ । छठ पर्वमा बाँसको ढाकी, डग्री, माटोको कोसिया कुरबार, हात्तीलगायतका सामग्रीहरु चढाइन्छ ।
त्यस्तै मंसिर ३ गते समितिले सांझ सांगितिक कार्यक्रम समेत गर्ने जनाएको छ । क्यानसर रोगबाट पीडित समुन्द्री माझी को सहयोगयार्थ पनि कार्यक्रम गर्न लागिएको जनाइएको छ । सांगितिक कार्यक्रममा माझीको उपचारमा सहयोग पु¥याउन एउटा डोनेशन बक्स राखिने पनि आयोजकले जनाएको छ ।
