बिर्तामोड :
माछा पालक किसानहरुले राज्यको निकायहरुबाट आफूहरु हेपिएको आरोप लगाएका छन् । उनीहरुले राज्यका निकायहरुले माछा पालक किसानका समस्या तथा गुनासा नसुन्ने गरेको बताएका छन् ।
शनिबार झापाको बिर्तामोड–३ सैनिकमोडमा सम्पन्न माछा पालक किसानहरुको झापा जिल्ला स्तरीय भेलामा सहभागी किसानले तीनै तहका सरकारले माछालाई कुनै प्राथमिकतामा नराखेको गुनासो गरे । ‘माछा पालक किसानलाई स्थानीय, प्रदेश र संघ कहीँबाट कुनै सहयोग छैन् । न प्राविधिक छ न प्राविधिक ज्ञान नै दिन्छ’ नेपाल मत्स्य पालक किसान संघ कोशी प्रदेशका अध्यक्ष विष्णु आचार्यले भने ।
उनले माछा हेर्ने गरि सरकारले छुट्टै निकाय बनाउनुपर्ने माग राखे । फर्मालिन हालेर ल्याएका मरेका भारतीय तथा मांगुर माछाको आयात तथा विक्री वितरणमा पूर्ण रुपमा कडाई गर्नुपर्नेमा उनको जोड थियो ।
मानव स्वास्थ्यमा क्यान्सर जस्तो रोग फैलाउन सक्ने मांगुर माछाको सेवनमा रोक लगाउने गरि सरकारले जनचेतना फैलाउनुपर्ने उनको भनाई छ ।
अर्जुनधाराका किसान डेगनाथ खतिवडाले माछा विषयलाई हेर्नेगरि कम्तिमा प्रदेश सरकारले छुट्टै मन्त्रालय वा बोर्ड गठन गर्नुपर्नेमा जोड दिए । उनले किसानलाई माछाको विषयमा बढीभन्दा बढी तालिम तथा प्राविधिक ज्ञान हासिल हुने किसिमका पाठशाला निर्माण गर्नुपर्ने बताए ।
मन्जिल देवानले भारतबाट अवैध रुपमा आयात हुने गुणस्तरहीन माछाको भुराको आयातमा पनि रोक लगाउनुपर्ने धारणा राखे । गुणस्तरीय माछाका भुरा नपाउदा किसानले आशातित लाभ लिन नसकिरहेको उनको भनाई छ । नेपाल मत्स्य पालक किसान संघका झापा अध्यक्ष होम सिटौलाले उत्पादित माछाको मूल्य प्रतिकेजी कम्तिमा २ सय ६० पाउने वातावरण बताउनुपर्नेमा जोड दिए । उनले अवैध रुपमा भित्रिने मरेका भारतीय माछाको आयात तथा विक्री वितरणमा रोक लगाउने कार्यमा किसान सधै क्रियाशिल हुनुपर्नेमा जोड दिए ।
किसान हरि मैनालीले अहिले माछा पालक किसानलाई गुणस्तरिय भुरा प्राप्त गर्ने ठूलो समस्या रहेको बताए । गुणस्तरिय भुरा प्राप्त गर्न नसक्दा किसानले बर्षेनी ठूलो आर्थिक क्षति बेहोर्नुपरेको धारणा राखे ।
छलफल कार्यक्रमको आयोजना मेची मत्स्य व्यवसायीक कृषक समूहका अध्यक्ष लक्ष्मी सिवाकोटीको अध्यक्षता तथा भेटेनरी अस्पताल तथा पशु सेवा विज्ञ केन्द्र झापाका प्रमुख शितल भट्टराईको प्रमुख आतिथ्यतामा सम्पन्न भएको थियो । कार्यक्रमको सञ्चालन मेची मत्स्य व्यवसायीक कृषक समूहका सचिव मोहनसिंह राजवंशीले गरेका थिए ।
