बिर्तामोड : वीरता लेडी जेसीजले चर्चित भारतीय रियालिटी शो इन्डियन आइडलको गायन प्रतिस्पर्धाबाट बाहिरिएपछि स्वदेश फर्किएकी गायिका मेनुका पौडेललाई भव्य स्वागत गरेको छ ।
लेडी जेसीजको टोली काँकडभिट्टा पुगेर गायिका पौडेललाई स्वागत गरेको हो । गायिका पौडेललाई स्वागत गर्न वीरता लेडी जेसीजकी अध्यक्ष मेनुका ओलीको नेतृत्वमा टोली काँकडभिट्टा पुगेको थियो ।
टोलीमा निवर्तमान अध्यक्ष संगीता गिरी, पूर्व अध्यक्ष सुष्मा पौडेल लगायत लेडी जेसीजका पदाधिकारीको सहभागिता रहेको थियो ।
स्वागत गर्दै अध्यक्ष ओलीले इन्डियन आइडलको प्रतिस्पर्धामा सशक्त भूमिका देखाएकी गायिका पौडेललाई संसारले चिन्ने अवसर प्राप्त गरेको बताउनुभयो ।
गायन प्रतिस्पर्धाकी धनी मेनुका स्वदेश फर्किए लगत्तै दर्जनौं सामाजिक संघसंस्थाले स्वागत गरेका छन् । झापाको हल्दीबारी गाउँपालिकाले उनलाई नगदसहित सम्मान पनि गरेको छ ।
