झापामा सवारी दुर्घटनामा ज्यान गुमाउनेको संख्या दिन प्रतिदिन बढ्दो छ ।  चालकको लापरबाही, तीव्र गति, चालक अनुमतिपत्र वितरणमा अनियमितता र जनचेतनाको अभाव दुर्घटनाका मुख्य कारण हुन् । 

नियमन गर्नुपर्ने ट्राफिक प्रहरी चेतनामूलक कार्यक्रमको साटो राजस्व संकलनमा मात्रै केन्द्रित हुने गरेको छ ।

जिल्लामा चालु आर्थिक बर्षको ११ महिनामा ७०  जनाले ज्यान गुमाएका छन्  भने १४४ जना सक्त र ५ सय जना सामान्य घाइते भएका छन् । 

तर ट्राफिक प्रहरीले सोही अवधिमा ४६ हजार ५४ वटा बढी सवारी चालकलाई कारबाही गरी ३ करोड ११ लाख २४ हजार १ सय ४१ रुपैंया रकम संकलन गरेको छ ।

‘नियमविपरीत कुनै पनि सवारीसाधन चलाइएको छ भने कानुनबमोजिम कारबाही गरी नियमन गरेका छौं,’ जिल्ला ट्राफिक प्रहरी कार्यालय झापाका प्रमुख नवराज न्यौपनेले भने, ‘साथै ट्राफिकसँग सम्बन्धित विषयवस्तुमा, दुर्घटनाका सम्बन्धमा, दुर्घटनाका कारणहरुका सम्बन्धमा, दुर्घटनाबाट बच्ने उपायहरुका सन्दर्भमा विभिन्न स्थानमा सचेतनामूलक कार्यक्रमहरु पनि सँगसँगै सञ्चालन गरेका छौं ।’

दुर्घटना न्यूनिकरणकालागि क्रियाशिल भएर लागि परेको ट्राफिक प्रहरी प्रमुख न्यौपाने बताउंछन् । दुर्घटना न्यूनिकरण गर्ने दायित्व ट्राफिक प्रहरीको मात्र नभएको उनको भनाई छ । 

सडक दुर्घटना निर्मूल पार्न असम्भव छ । तर सवारीसाधन चलाउने बानीमा सुधार, ट्राफिक नियम पालना, सडक अवस्था राम्रो बनाउने तथा राज्यको नीतिगत तहबाट सुधार गरिने हो भने दुर्घटना जोखिम कम गर्न अवश्य सकिन्छ । तसर्थ पनि राजश्व संकलनमा मात्रै केन्द्रित हुनु भन्दा यस्ता कुरामा प्रहरीको ध्यान पुग्न जरुरी छ ।