झापा भद्रपुरका उद्योगी दिपेश ढकाल ‘उत्कृष्ट सामाजिक व्यक्तित्व सम्मान’ बाट सम्मानित भएका छन् । राजनीतिक, सामाजिक, स्वास्थ्य, शिक्षा र खेलकुद लगायतका क्षेत्रहरुमा आफ्नो कुशल नेतृत्वदायी क्षमता प्रस्तुत गर्दै पुर्याएको योगदानको कदर स्वरुप ढकाललाई सम्मान गरिएको हो ।
नेपाल निजामती कर्मचारी युनियनको स्थापना दिवसको अवसरमा भद्रपुरमा आयोजित एक कार्यक्रमका बीच ढकाललाई सम्मान गरिएको हो ।
उनलाई भद्रपुर नगरप्रमुख गणेश पोखरेल, कार्यक्रमका अध्यक्ष कविन्द्रविक्रम नेम्वाङ, युनियनका सचिव भानुभक्त भट्टराई, नेपाली कांग्रेस झापाका कार्यवहाक सभापति केशवराज पाण्डेलगायतले सम्मानपत्र प्रदान गरेका थिए ।
रोटरी क्लब भद्रपुरका पूर्वअध्यक्ष रहेका ढकाल भद्रपुर झापा गोल्डकप र झापा जिल्ला ब्याडमिन्टन संघका अध्यक्ष छन् । उनी दर्जनौँ सामाजिक संघसंस्थामा आबद्ध रहेका छन् । उनी जिल्लाका सफल उद्योगीको रुपमा चिनिन्छन् । उनी समाजसेवी पनि हुन् ।
त्यस्तै, झापा जिल्ला उसु संघ, झापा उद्योग संघ, रेडियो भिजन प्रालिको उपाध्यक्ष रहेका उनी गोरखाली सिमेन्ट उद्योग, दक्षिणकाली प्लास्टिक इन्डस्ट्रिज र खुश्बु इँटा उद्योगका प्रबन्ध निर्देशक छन् ।
