बिर्तामोड ः झापाको बिर्तामोड ४ मा मुख्य कार्यालय रहेको सिम्रिक बचत तथा ऋण सहकारी संस्थाले चालु आवमा आफ्ना शेयर सदस्यलाई ५५ लाख रुपैंया भन्दा बढी रकम सहयोग वितरण गरेको छ ।


संस्थाले स्वास्थ्य उपचार , अप्रेशन , प्राणघातक रोग खर्च सहित कर्जा मिनाह लगायतको शिर्षकमा ४ सय बढी शेयर सदस्यलाई चालु आवको साउनदेखि माघ मसान्त सम्ममा ५५ लाख रुपैंया बढी रकम उपलब्ध गराएको हो ।


शेयर सदस्यको उपचारका लागि र मृत्यु भएको खण्डमा प्रदान गर्ने राहत रकम, कर्जा मिनाह सहितका अन्य  बितरण कार्यलाई निरन्तरता दिंदै गएको संस्थाका कार्यकारी प्रमुख कमलबहादुर बस्नेतले जानकारी दिए ।


 शेयर सदस्य र सदस्यका परिवारलाई सुबिधा बापत प्रसुति सुबिधा , सामान्य उपचार सुविधा , अप्रेशन , प्राणघातक रोग र मृत्यु भएका सदस्यहरुको परिवारमा राहत सुविधा सहित कर्जा मिनाह लगायतका सेवा संस्थाले उपलव्ध गराउंदै आएको उनले बताए ।


झापा, मोरङ, पाँचथर र इलाम जिल्लाका ४६ वटा सेवा केन्द्र मार्फत सेवा प्रवाह गरिरहेको सिम्रिक साकोसको हाल ६७ हजार ४ सय ८० शेयर सदस्य रहेको अध्यक्ष सुवास भट्टराईले जानकारी दिए ।


उनले सदस्यलाई नीति र निमय अनुसारको सेवा सुविधा उपलब्ध गराउंदै आएको र सदस्यलाई उद्धमसंग जोड्न संस्था सदैव लागि परेको बताए ।  


संस्थाको हाल  १५ हजार ५ सय २ ऋणी, वासलात ३ अर्ब १९ करोड बढी, शेयरपुंजी ३४ करोड ३२ लाख बढी, कोषहरु २५ करोड बढी, निक्षेप १ अर्ब ९० करोड बढी, लगानी कर्जा २ अर्ब ७२ करोड बढी रहेको प्रतिवेदनमा उल्लेख छ ।


संस्थाले बचत तथा ऋण कारोबार संगै अन्य सामाजिक क्षेत्रमा पनि उत्तिकै सक्रियताका साथ काम गरिरहेको छ ।


संस्थाले चालु आवमा मात्र सदस्यहरुलाई उद्धम बनाउंदै रोजगारीमा जोड्न अचार बनाउने , ब्युटिसियन , धुपबात्ती , सिलाई बुनाई लगायतका तालिम प्रदान गरिसकेको छ ।

त्यस्तै सामाजिक उत्तरदायित्व वहन गर्दै बिभिन्न टोल समितिलाई होर्डिङ बोर्ड, गमला, ट्राफिक चिन्हका बोर्ड, सामुदायिक विद्यालयलाई शैक्षिक सामग्री वितरण सहित झापा गोल्डकप लगायतका अन्य संघ संस्थालाई आर्थिक सहयोग उपलब्ध गराएको छ ।

२०६७ सालमा स्थापना भएको संस्थामा हाल कर्मचारी २ सय ८० जना कार्यरत छन् ।