भद्रपुर

झापामा प्रहरीले लागूऔषध कारोबारीलाई पक्रनका लागि गोली चलाएको छ।

हिजो साँझभद्रपुरमा प्रहरीले  कारोबारी पक्रनका लागि गोली चलाएको हो।
भद्रपुर –७ चिया पसलनजिक हुलाकी राजमार्गमा जिल्ला प्रहरी कार्यालय झापाबाट खटिएका प्रहरी निरीक्षक बिजय चौहान र लागूऔषध नियन्त्रण ब्युरो कार्यालय

काँकरभिट्टाबाट प्रहरी नायव निरीक्षक  सोमेश लामिछाने सहितको  ७ जनाको संयुक्त टोलीले चेकजाँच गर्ने क्रममा लागूऔषध सहित दुईजनालाई पक्राउ गरेको हो।

चेकजाँच गर्न खोज्दा प्रहरीमाथि हातपात गरी भाग्न खोजेको भन्दै नियन्त्रणमा लिनको लागि चाईनिज ठुलो तथा सानो पेस्तोलवाट ३÷३ गरी जम्मा ६ राउण्ड गोली फायर गरेको जनाइएको छ ।

प्रहरीले भारत बिहार राज्य, किशनगञ्ज जिल्ला बस्ने बर्ष ३५ का मनिसुर आलम र कचनकवल गाउँपालिका –५ बस्ने बर्ष ५५ का नशरुद्धिन मियालाई लागू औषधसहित पक्राउ गरेको हो।

गोली प्रहारबाट एकजना कारोबारी घाइते भएका छन् । प्रहरीले आलमको साथबाट २ वटा प्लाष्टिकको पोकामा प्लाष्टिकबाहेक १०३ ग्राम ७० मिलिग्राम र मियाको

साथबाट २ वटा प्लाष्टिकको पोकामा प्लाष्टिकबाहेक १०२ ग्राम १० मिलिग्राम ब्राउनसुगर बरामद भएको जनाएको छ ।

मियाको दाहिने खुट्टाको पिड्युँलामा एक राउण्ड गोली लागेको छ । सामान्य घाइते भएका मियालाई ओमसाई पाथीभरा अस्पताल भद्रपुरमा सामान्य उपचार गरिएको छ ।

कुल जम्मा प्लाष्टिकबाहेक २०५ ग्राम ८० मिलिग्राम ब्राउनसुगरसहित दुवैलाई जिल्ला प्रहरी कार्यालयमा राखिएको छ ।घटनाका विषयमा थप अनुसन्धान भइरहेको जिल्ला प्रहरी कार्यालय झापाले जनाएको छ।

पछिल्लो समय झापा जिल्ला लागू औषध कारोबारी तथा प्रयोगकर्ताहरूको लागि ट्रान्जिट पोइन्ट बनिरहेको छ । 

प्रहरीले विशेष अप्रेसनहरु सञ्चालन गरिरहेको भए पनि कारोबारी तथा प्रयोगकर्ताहरूको सङ्ख्या घटेको छैन ।