झापाको अर्जुनधारा नगरपालिकाले आज १२ जना अपाङ्गता भएकाहरूलाई सहायक सामग्री वितरण गरेको छ । नगरपालिकाको महिला तथा बालबालिका शाखाले आज एक कार्यक्रमका बीच उनीहरूलाई सहायक सामग्री वितरण गरेको हो । अपाङ्गता भएका व्यक्तिहरूको दैनिक जीवनमा सहजता ल्याउने उद्देश्यले सहायक सामग्री वितरण गरिएको नगर प्रमुख बलदेव सिंह गोम्देनले बताए ।  

सामाजिक विकास मन्त्रालय कोशी प्रदेश, अर्जुनधारा नगरपालिका तथा करुणा फाउन्डेसन नेपालको त्रिपक्षीय साझेदारीमा सञ्चालित अपाङ्गता रोकथाम तथा पुनर्स्थापना कार्यक्रम अन्तर्गत उनीहरूलाई सहायक सामग्री वितरण गरिएको छ।

सहायक सामग्री वितरण गर्नुहुँदै नगर प्रमुख गोमदेनले प्राप्त सामग्रीको अधिकतम उपयोग गर्न आग्रह गरे ।  कार्यक्रममा नगर उपप्रमुख खड्गमाया पराजुलीले अपाङ्गता भएका व्यक्तिहरूको जीवनस्तर उकास्नेदेखि दैनिकी सहज बनाउन नगरपालिकाले विभिन्न कार्यक्रम गर्दै आएको बताए । 

कार्यक्रममा केन्ड्रीक दाहाल, मञ्जुल भुजेल, जोयल ढकाल, नरबहादुर श्रेष्ठ, सबिना डाँगी, उषा सेडाई, सोनी लुंगेली मगर, विष्णु राजवंशी, तुलसादेवी अधिकारी, तुलसा ढकाल, मिलन बराल र रिहा कार्कीलाई माग र आवश्यकताका आधारमा विभिन्न सहायक सामग्री प्रदान गरिएको महिला तथा बालबालिका शाखा प्रमुख सूर्यकला पन्धाकले जानकारी दिइन । 

यसअघि सोही कार्यक्रम अन्तर्गत नगरपालिकाले अपाङ्गता भएका परिवारको जीविकोपार्जनका लागि ओभरलक मेसिन प्रदान गरिसकेको नगरपालिकाका प्रेस संयोजक नन्दलाल खतिवडाले बताए ।