अर्जुनधारा,  झापाको अर्जुनधारा नगरपालिकाको सबै वडाको सेवा नगरबाटै प्रवाह हुने भएको छ । नगरपालिकाको आज बसेको कार्यपालिका बैठकले नगरका सबै वडाको सेवा सुचारु गर्न नगरपालिकाबाटै सेवा प्रवाह गर्ने निर्णय गरिएको हो । गत भदौ २३ र २४ गते जेन जी समूहको आन्दोलनका क्रममा भएको नगरपालिकाको कार्यालय र सबै वडा कार्यालयमा तोडफोड तथा आगजनी भई भौतिक संरचना, कार्यालय सामग्री तथा अभिलेखहरुमा पूर्ण क्षति भएको छ ।

तत्काल वडा कार्यालयबाट नियमित सेवा प्रवाह गर्ने अवस्था नरहेकाले वडा कार्यालयबाट प्रदान गर्नुपर्ने अतिआवश्यक सेवा प्रवाहका लागि वैकल्पिक व्यवस्था अनुरुप नगरपालिकाको कार्यालयको सभाहलमा सबै वडाहरुको अतिआवश्यक सेवा प्रवाह गर्ने निर्णय गरिएको नगरप्रमुख बलदेवसिंह गोम्देन तामाङले जानकारी दिनुभयो ।

बैठकले आन्दोलनका क्रममा मृत्यु भएका सबैको चिरशान्तिको कामना गर्दै श्रद्धाञ्जली समेत अर्पण गरेको छ । साथै, घाइते व्यक्तिहरुको शीघ्र स्वास्थ्य लाभको कामना गरिएको छ ।

बैठकमा जेन जी समूहले गरेको आन्दोलन, त्यस दौरान उत्पन्न विध्वंसात्मक गतिविधि एवम् पछिल्लो समय उत्पन्न विषम परिस्थितिको समीक्षात्मक छलफल समेत गरिएको छ । बैठकमा नगरका सबै वडाध्यक्षहरुले आआफ्नो वडाको अवस्थाका सम्बन्धमा जानकारी गराएका थिए ।

आन्दोलनको क्रममा यस नगरपालिकाको नगर कार्यपालिकाको कार्यालय तथा सबै वडा कार्यालयको भौतिक संरचना, मेसिनरी औजार उपकरण तथा सवारी साधनहरु, महत्वपूर्ण अभिलेख लगायत कागजातहरुमा अपुरणीय क्षति भएको छ ।

सार्वजनिक सम्पत्तिहरुमा तोडफोड तथा आगजानी गर्ने व्यक्तिहरुको पहिचान गरी तिनलाई प्रचलित कानून बमोजिम कारबाही गर्नका लागि सम्बन्धित निकायमा अनुरोध गर्ने बैठकले निर्णय गरेको छ ।