झापा : झापाको बिर्तामोड नगरपालिका–५ निवासी सुसित ढकालले आफ्नो जन्मदिनको अवसरमा प्रहरी कार्यालयलाई आर्थिक सहयोग गरेका छन् । ईलाका प्रहरी कार्यालय अनारमनी र जिल्ला ट्राफिक प्रहरी कार्यालय बिर्तामोडको पुनर्निर्माणका लागि ढकालले रु ५१ हजार १ सय ११ रुपैयाँ सहयोग गरेका हुन् ।
ढकालले ईलाका प्रहरी कार्यालय अनारमनीका प्रमुख प्रहरी नायब उपरीक्षक डिएसपी विजय श्रेष्ठ, पुनर्निर्माण कार्यका नेतृत्वकर्ता पदम श्रेष्ठ र रमेश चौधरीलाई कार्यालयमै पुगेर नगद हस्तान्तरण गरेका हुन् ।
आफ्नो जन्मदिनलाई सामाजिक योगदानसँग जोड्दै सार्वजनिक संस्था पुनर्निर्माणमा सहयोग गर्न पाउँदा खुशी लागेको उनले बताए । प्रहरी कार्यालय पुनर्निर्माणका लागि आर्थिक सहयोग जुट्ने क्रम जारी रहेको नेतृत्वकर्ता पदम श्रेष्ठले जानकारी दिए ।
