काठमाडौं। साविक विजेता अर्जेन्टिनाले पहिलोपटक विश्वकप खेलिरहेको केप भर्डमाथि अतिरिक्त समयमा ३–२ को कठिन जित निकाल्दै फिफा विश्वकपको अन्तिम १६ मा स्थान सुरक्षित गरेको छ।
शुक्रबार मियामी स्टेडियममा ६४ हजार ४७८ दर्शकमाझ भएको रोमाञ्चक खेलमा केप भर्डले दुई पटक पछि परे पनि उत्कृष्ट पुनरागमन गर्दै खेललाई अतिरिक्त समयसम्म पुर्याएको थियो। तर अतिरिक्त समयको दोस्रो हाफको छैटौँ मिनेटमा आएको आत्मघाती गोलले अर्जेन्टिनालाई राहत दिलायो।
अब अर्जेन्टिनाले अन्तिम १६ मा मंगलबार एटलान्टामा इजिप्टसँग प्रतिस्पर्धा गर्नेछ। खेलको २९औँ मिनेटमा लियोनल मेसीले प्रतियोगिताको आफ्नो सातौँ गोल गर्दै अर्जेन्टिनालाई अग्रता दिलाएका थिए। लिसान्ड्रो मार्टिनेजको लामो पासलाई मेसीले बायाँ खुट्टाको बाहिरी भागले नियन्त्रण गर्दै शक्तिशाली प्रहारमार्फत गोल गरेका थिए। यो विश्वकप इतिहासमा मेसीको २०औँ गोल पनि हो।
तर दोस्रो हाफको सुरुआतपछि केप भर्डले उत्कृष्ट प्रदर्शन गर्दै ५९औँ मिनेटमा बराबरी गोल फर्कायो। कप्तान रायन मेन्डेसको पासमा डच मूलका मिडफिल्डर डेरोय डुआर्टेले उत्कृष्ट फिनिसिङ गर्दै खेल १–१ को बराबरीमा ल्याए।
निर्धारित समयमा दुवै टोलीबाट थप गोल हुन नसकेपछि खेल अतिरिक्त समयमा पुगेको थियो। अतिरिक्त समयको पहिलो हाफको दोस्रो मिनेटमा लिसान्ड्रो मार्टिनेटले आकर्षक प्रहार गर्दै अर्जेन्टिनालाई पुनः २–१ को अग्रता दिलाए।
तर केप भर्ड फेरि पनि झुकेन। खेलको १०३औँ मिनेटमा लेफ्ट ब्याक सिड्नी लोपेस काब्रालले सुन्दर कर्लिङ प्रहार गर्दै गोल गरेपछि खेल २–२ को बराबरीमा पुग्यो।
खेल पेनाल्टीतर्फ जाने संकेत देखिएको अवस्थामा अतिरिक्त समयको दोस्रो हाफको छैटौँ मिनेटमा मेसीको कर्नरमा क्रिस्टियन रोमेरोले हेड गरेका थिए। उक्त बल केप भर्डका सेन्टर ब्याक डिने बोर्जेसको हातमा लाग्दै दिशान्तर भई गोलमा परिणत भयो। सोही आत्मघाती गोल निर्णायक बन्दा अर्जेन्टिना ३–२ ले विजयी बन्यो।
त्यसपछि काब्रालले फ्रिकिकमार्फत फेरि बराबरी गर्ने सुनौलो अवसर पाए पनि अर्जेन्टिनाका गोलकिपर एमिलियानो मार्टिनेजले उत्कृष्ट बचाउ गर्दै टोलीको जित सुरक्षित गरे।
विश्व वरियतामा ६७औँ स्थानमा रहेको तथा पहिलोपटक विश्वकप खेलेको केप भर्ड प्रतियोगिताबाट बाहिरिए पनि आफ्नो साहसी प्रदर्शनका कारण सबैको प्रशंसा बटुल्न सफल भयो।
समूह चरणमा स्पेन, उरुग्वे र साउदी अरेबियालाई बराबरीमा रोकेको केप भर्डले यस खेलमा पनि तीन पटकका विश्व च्याम्पियन अर्जेन्टिनालाई अन्तिमसम्म कडा चुनौती दिएको थियो।
विशेषगरी केभिन पिना, भोजिन्या, पिको लोपेस र सिड्नी लोपेस काब्रालले उत्कृष्ट प्रदर्शन गर्दै केप भर्डलाई अन्तिम समयसम्म प्रतिस्पर्धामा कायम राखेका थिए। तर अन्ततः भाग्य अर्जेन्टिनाको पक्षमा रहँदा केप भर्डको ऐतिहासिक यात्रा अन्त्य भएको छ।
