नेपाल पुलिस क्लब शहीद स्मारक ए डिभिजन लिगको रेलिगेसन क्षेत्रबाट माथि उक्लिएको छ । शुक्रबार दशरथ रंगशालामा संकटा क्लबलाई २–१ गोल अन्तरले हराउँदै पुलिस अंक तालिकामा पुछारको स्थान छोड्न सफल भएको हो ।
पुलिसका लािग मोजेस ग्याबा र मोहमद आशिकले गोल गरे । संकटाका निशान खड्काले फ्रिकिकमार्फत एक गोल फर्काए । जितसँगै १७ खेलबाट १९ अंक जोडेको पुलिस ११ औं स्थानमा उक्लिएको छ । १७ खेलमा २० अंक जोडेको संकटा लिगको दशौं स्थानमा छ । लिगअन्तर्गत आजै भएको अर्को खेलमा मनाङ मस्र्याङ्दी क्लब र हिमालयन शेर्पा क्लबले बराबरी खेल्दै अंक बाँडेका छन् ।
एन्फा कम्लेक्स सातदोबाटोमा भएको खेलमा मनाङ र हिमालयनले १–१ गोलको बराबरी खेलेका हुन् । मनाङका लागि निराजन धामी र हिमालयनका लागि अबायानी फकुल्नीले गोल गरे । बराबरीसँगै १७ खेलबाट २१ अंक जोडेको मनाङ लिगको आठौं र स्थानमा कायमै रहेको छ । १७ खेलमा २१ अंक जोडेको हिमालयन तालिकाको नवौं स्थानमा कायमै छ ।
