झापा : नेपाल हिन्दू राष्ट्र पुर्नस्थापना मञ्चले नेपाललाई हिन्दू राष्ट्र बनाउनु पर्ने माग अघि सारेको छ । मञ्चले आइतवार बिर्तामोडमा पत्रकार भेटघाट गर्दै सहि तरिकाले हिन्दू राष्ट्र नदिए आन्दोलनसमेत गर्ने चेतावनी दिएको छ ।
मञ्चका संस्थापक तथा केन्द्रिय अध्यक्ष डा. बिष्णुप्रसाद बरालले नेपाललाई हिन्दू राष्ट्र बनाउनु पर्ने माग राख्दै विश्वका राष्ट्रपति, प्रधानमन्त्री र विशिष्ठ नेताहरुलाई पत्राचार समेत गरेको बताएका छन् ।
हिन्दू राष्ट्र चाहनेलाई आफुहरु समर्थन गर्ने पनि उनले जनाएका छन् । हिन्दू राष्ट्रमा सवै जातजाती अटाउन सकिने र भाइचारा हुने भएकाले पनि नेपाललाई हिन्दू राष्ट्र बनाउन आफुहरुले माग अघि सारेको उनले बताए ।
हिन्दूलाई अन्यले अपशब्द प्रयोग गर्ने गरेको प्रति उनले दुःख ब्यक्त गरेका छन् । गरिब देश भएर पनि कसैको गुलाम नभएको नेपाललाई हिन्दू राष्ट्र बनाउनु पर्नेमा बरालले जोड दिए ।
कार्यक्रमको सञ्चालन नेपाल हिन्दू राष्ट्र पुर्नस्थापना मञ्च नेपालका युवा संगठनका अध्यक्ष अभय राजवंशीले गरेका थिए ।
कार्यक्रममा अलकोच राजवंशी स्टुडेन्ट युनियनका चिफ एड्भाइजर प्रणवज्योती राजबंशीको पनि उपस्थिति रहेको थियो ।
