झापा : झापाको कन्काई नगरपालिका ७ स्थित दुर्गापुरमा आज मङ्लबार सवारी दुर्घटना भएको छ । पूर्वपश्चिम राजमार्गमा बस र मोटरसाइकल एक आपसमा जुध्दा दुई जनाको मृत्यु भएको छ । बसको ठक्करबाट मोटरसाइकलमा सवार एक दम्पतीको मृत्यु भएको हो ।
दुर्घटनामा परी मोटरसाइकलमा सवार अर्जुनधारा नगरपालिका ६ का ५२ वर्षिय नरेन्द्र मैनाली र उनकी श्रीमती ५० वर्षिया सीतादेवी मैनालीको मृत्यु भएको जिल्ला ट्राफिक प्रहरी कार्यालय झापाले जनाएको छ ।
पूर्वबाट पश्चिमतर्फ जाँदै गरेको को १ ख ६७९४ नम्बरको बसले विपरित दिशाबाट आउँदै गरेको मे ४ प ५०९२ नम्बरको मोटरसाइकललाई ठक्कर दिँदा मैनाली दम्पत्तीको मृत्यु भएको जनाइएको छ ।
दुर्घटनामा परी घाइते भएका उनीहरुको उपचारको क्रममा ४.२५ बजे बिएण्डसी अस्पतालमा मृत्यु भएको प्रहरीले जनाएको छ ।
दुर्घटनामा संमलग्न बस सहित चालक मोरङ सुन्दरहरैचा वडा नं. ६ बस्ने ४० वर्षिय भुपाल देवानलाई प्रहरीले नियन्त्रणमा लिएको जनाएको छ ।
