बिर्तामोड : झापाको बिर्तामोड नगरपालिकाका नगर प्रहरीका इन्चार्ज किरण भनिने ढलकबहादुर पाण्डे र सह(कमाण्डर राजकुमार खड्का निलम्बित भएका छन् ।
भ्रष्टाचारमा मुछिएपछि उनीहरु दुवैलाई नगरपालिकाले निलम्बन गरेको हो । बिर्तामोड ७ का वडाध्यक्ष अविरल कृष्ण खरेलकै सामुन्ने नगर प्रहरीका इन्चार्ज पाण्डेले साता अघि नगरपालिका परिसरमै घुस मागेका थिए ।
उनीहरुको विषयमा छानबिन गर्न नगरपालिकाले वरिष्ठ कार्यक्रम अधिकृत जय तिम्सिनाको संयोजकत्वमा एक छानबिन समिति गठन गरेको छ ।
जसको सदस्यहरुमा नायब सुब्बा मेघराज बाँस्तोला र न्यायिक समितिकी टीकामाया लामिछाने रहेका छन् । त्यस समितिले उनीहरुमाथि छानबिन शुरु गरिसकेको र छानबिनका लागि आरोपित दुवैलाई निलम्बन गरिएको प्रमुख प्रशासकीय अधिकृत विनोदकुमार न्यौपानेले बताए ।
समितिले एक महिनाको कार्य अवधि पाएको छ । त्यस्तै अन्य घटनामा पनि उनी मुछिएका छन् ।पदको दुरुपयोग गर्दै पाण्डे र खड्काले मनोमानी गरेको नगर प्रहरीको सिंगो टीमले आरोप लगाएका छन् ।
बिर्तामोड नगरपालिकामा १५ जना नगर प्रहरी छन् । त्यसमध्ये सबै १३ जना पाण्डे र खड्काको विरुद्धमा देखिएका छन् । बिर्तामोड नगरमा अनावश्यक रुपमा जरिवाना बाहेकको रकम नगर प्रहरी पाण्डेले रबिन्द्रकुमार भारतीसंग मागेका थिए ।
भारतीलाई बिर्तामोड बसपार्क पूर्वपट्टि चिया बगान नजिकै मोटरसाइकलमा फोहोर फाल्दै गरेको अवस्थामा फोहोरको पोको सहित नगर प्रहरीले मोटरसाइकलसहित नियन्त्रणमा लिएको थियो ।
भारतीले नगरपालिकामा आएर फोहोर फालेवापत ४ हजार रुपैयाँ जरिवाना वापत रकम तिरेका थिए । अबदेखि जथाभावी फोहोर नफ्याक्ने शर्तमा उनलाई कागज गरिएको थियो ।
त्यसपछि मोटरसाइकलको चाबी माग्न नगर प्रहरी इन्चार्ज पाण्डेसंग जाँदा आफुलाई १ हजार घुस मागेको भारतीले आरोप लगाएका थिए ।
