अंग्रेजी भाषा शिक्षकहरुको संगठन नेपाल अंग्रेजी भाषा शिक्षक संघ (नेल्टा ) झापा शाखालाई उत्कृष्ट घोषणा गरिएको छ ।
यहि फागुन ५ देखि ७ गते सम्म काठमाडौंमा भएको २७ औं अन्तर्राष्ट्रिय सम्मेलनमा उत्कृष्ट कार्य सम्पादन गर्ने शाखामध्ये नेल्टा झापालाई उत्कृष्ट शाखा को घोषणा गरिएको नेल्टा झापा शाखाका अध्यक्ष धर्मेन्द्र भट्टराईले जानकारी दिए ।
उनका अनुसार अब झापा शाखाले नगद दुई लाख रुपैयाँ पुरस्कार प्राप्त गर्ने छ । झापा शाखाले आफ्नो स्थापनाकालदेखि नै विभिन्न किसिमका गतिविधिहरु सञ्चालन गर्दै आएको छ ।
शिक्षकहरुका लागि तालिम गोष्ठी सेमिनार र सम्मेलनहरु संचालन गर्नुका साथै राष्ट्रिय तथा अन्तराष्ट्रिय तालिम तथा सम्मेलन हरुमा सहभागी गराएर शिक्षकको पेशागत दक्षता अभिवृद्धि कार्यमा सहयोग पुर्याउदै आएको छ।
यसैगरी मकवानपुर शाखा दित्तीय र ललितपुर शाखा तृतीय भएका छन् । स्वयंसेवी तथा गैरनाफामूलक संस्थाको रुपमा चिनिएको संघले शिक्षकको पेशागत बिकासका लागि गरेको कार्यको उचित कदर भएको जनाएको छ । हाल झापा जिल्लामा १५ सय बढी अंग्रेजी भाषा शिक्षक रहेको जनाइएको छ ।
