बडि ग्यारेज बिर्तामोडको आयोजना हुने कोशी प्रदेशस्तरीय दोस्रो मिस्टर कञ्जनजंघा बडी विल्डिङ च्याम्पियनसीप प्रतियोगिताको मिति सरेको छ ।
झापाको बिर्तामोडमा आज आइतबार पत्रकार भेटघाट मार्फत आयोजकले प्रतियोगिताको मिति सरेको जानकारी दिएको हो ।
बडी ग्यारेजका अध्यक्ष अर्जुनकुमार मैनालीले जेठ १२ र १३ गते हुने भनिएको प्रतियोगिता कारणबस जेठ २५ र २६ गते हुने जानकारी दिए ।
उनका अनुसार २५ गते छनोट चरण र २६ गते फाइनल राउण्डको प्रतियोगिता हुने छ । प्रतियोगिताका लागि धेरै खेलाडीले तयारी गरिरहेको र मितिबारे अन्योल सिर्जना भएको अवस्थामा आयोजकले प्रतियोगिताको मिति सरेको र प्रतियोगिता नयाँ तालिका अनुसार हुने जनाएको हो ।
प्रतियोगितामा प्रवेशका लागि यस पटक टोकन र पास सिस्टम लागू गरिने आईएफबीबीएफका केन्द्रीय सदस्य दिपेन चौधरीले बताए । अघिल्लो पटक प्रतियोगिताका दौरान केही समस्या देखिएकाले यस पटक पास सिस्टम लागू गर्न लागिएको उनको भनाइ छ ।
प्रतियोगिताका नयाँ मिति तय भएसँगै प्रतियोगिताको तयारी तीव्र पारिएको छ । आयोजक समितिका संयोजक तथा बडी ग्यारेज बिर्तामोडका सञ्चालक राम दाहालले प्रतियोगिता पहिलो सिजन भन्दा उत्कृष्ट बनाउने उद्देश्यका साथ काम भइरहेको बताए ।
प्रतियोगितामा ५५, ६०, ६५, ७० र ७५ केजी तौल समूहमा प्रतिष्पर्धा हुने छ । प्रतियोगितामा प्रथम हुनेले ३ लाख ११ हजार १११ रुपैयाँ, ट्रफी, मेडल र प्रमाण पत्र प्राप्त गर्ने आयोजक समितिका अध्यक्ष मैनालीले जानकारी दिए ।
यस्तै, दोस्रो हुनेले दुई लाख ५० हजार, तेस्रो हुनेले १ लाख ५० हजार, चौथो हुनेले १ लाख र पाँचौं हुनेले ७५ हजार रुपैयाँ, ट्रफी, मेडल र प्रमाण पत्र प्राप्त गर्ने छन् । मिस्टर कञ्चनजंघा बडी बिल्डिङ च्याम्पियनसिप काठमाडौं पछिको सर्वाधिक राशीको प्रतियोगिता रहेको आयोजकको दाबी छ ।
