ए डिभिजन लिगमा एफसी खुमलटारले उपाधि दाबेदार सातदोबाटो युथ क्लबलाई हराएको छ । आज त्रिपुरेश्वरको दशरथ रङ्गशालामा भएको खेलमा खुमलटारले सातदोबाटोलाई १–० गोलले हरायो ।
खुमलटारको जितमा मेसुके ओलुमोउले निर्णायक गोल गरे । जितपछि पनि खुमलटार २१ अंक सहित ’रेलिगेशन जोन’ मै छ ।
सातदोबाटो २९ अंक सहित चौथो स्थानमा छ । एन्फा कम्प्लेक्समा आजै भएको खेलमा पुछारको नेपाल पुलिस क्लबले थ्री स्टार क्लबलाई १–० गोल अन्तरले हरायो । पुलिसको जितमा अहमद हिजाजीले निर्णायक गोल गरे । सातौं जितसँगै पुलिस २० खेलमा २५ अंक जोडेर आठौं स्थानमा उक्लिएको छ ।
थ्री स्टार २० खेलमा २६ अंक जोडेर छैटौं स्थानमा रहेको छ । १४ टोली सहभागी लिगको पुछारका दुई वटा टोली ’रेलिगेशन जोन’ मा परेर ’बी’ डिभिजनमा घटुवा हुनेछन् ।
