झापाको भद्रपुर स्थित आन्तरिक राजस्व कार्यालय लक्ष्य अनुसारको राजस्व संकलन गर्न असफल भएको छ । कार्यालयले चालु आर्थिक बर्षको ११ महिनामा रु. २ अर्ब ५६ करोड ५८ लाख ९६ हजार राजस्व संकलन गरेको छ । कार्यालयले असार १५ गते सम्ममा सो राजश्व संकलन गरेको हो ।
कार्यालयले सो अवधिमा ३ अर्ब ६९ करोड २० लाख ३७ हजार राजस्व संकलन गर्ने लक्ष्य लिएको थियो ।
जिल्लाका उद्योग धन्दा, कलकारखाना तथा व्यापार व्यवसायमा आएको मन्दीको असरले राजस्व संकलन प्रभावित बनेको आन्तरिक राजस्व कार्यालय झापाका प्रमुख सुभप्रसाद रिजालले बताए ।
कार्यालयले आर्थिक बर्ष २०७९÷८० को साउनदेखि असार १५ गते सम्ममा आयकरवापत रु. १ अर्ब १९ करोड ५० लाख १८ हजार संकलन गरेको छ ।
सो अबधिमा कार्यालयले आयाकर वापत रु. १ अर्ब ६३ करोड ३० लाख ८९ हजार रकम संकलन गर्ने लक्ष्य लिएको थियो ।
यसैगरी, मूल्य अभिवृद्धि करतर्फ रु. ८६ करोड ४५ लाख ६६ हजार र अन्त शुल्कवापत रु. ४२ करोड ३१ लाख १९ हजार राजस्व संकलन गरेको छ ।
पछिल्लो समय देखिएको आर्थिक मन्दीले कार्यालयको राजश्व संकलनमा समस्या भएको जनाइएको छ । कार्यालय मतहातमा ५४ हजार बढी करदाता रहेको बताइएको छ ।
