झापाको मेचीनगर–८ का सुन्दर किसानको हत्या आफ्नै नातेदार दाजुभाईले गरेको खुलेको छ । घटनाको अनुसन्धानले हत्यामा नातेदारको संलग्नता देखिएको प्रहरीले जनाएको छ ।
किसानको शव बिहीवार बिहान घर नजिकै पैनीको झाडीमा फेला परेको थियो । घटनापछि अनुसन्धानका लागि खटिएको प्रहरी टोलीले हत्यामा संलग्न भएको अभियोगमा दुई जनालाई पक्राउ गरेको छ ।
पक्राउ परेकालाई आज सार्वजनिक गरिने झापा प्रहरीका प्रवक्ता डीएसपी खगेन्द्रप्रसाद रिजालले बताए । घरायसी आपसी पुरानो विवादका कारण किसानको हत्या भएको प्रहरीले जनाएको छ । प्रहरीले रामजी किसान र कुकुरसिंह किसानलाई पक्राउ गरेको छ । उनीहरुले सिक्कलले हानेर किसानको हत्या गरेको प्रहरी दावी छ ।
घटनाको अनुसनधानका लागि प्रहरीले धरानबाट तालिम प्राप्त कुकुर पनि बोलाएको थियो ।
