बिर्तामोड : जिल्ला ट्राफिक प्रहरी कार्यालय झापाका प्रमुखको बिदाइ तथा स्वागत गरिएको छ । ट्राफिक प्रमुख नवराज न्यौपानलाई स्वागत र प्रविण जोशी ज्ञवालीको बिदाइ गरिएको हो ।
प्रहरी प्रधान कार्यालय मानव श्रोत विकास विभाग अन्तर्गत कर्मचारी प्रशासन महाशाखाले एक सूचना निकाल्दै ९ सय ५८ इन्सपेक्टरको एकैपटक सरुवा गरिएको जनाएको छ । सोहि अनुसार ५ महिना अघि आएका ज्ञवालीको इलाका प्रहरी कार्यालय नवलपुर सिन्धुपाल्चोकमा सरुवा भएको हो ।
झापा ट्राफिक प्रहरीका कर्मचारीले आज एक संक्षिप्त कार्यक्रमका बिच प्रमुख ज्ञवालीको बिदाइ तथा न्यौपानेको स्वागत गरिएको जिल्ला ट्राफिक प्रहरी कार्यालयका प्रहरी नायब निरीक्षक राजकुमार बस्नेतले जानकारी दिए ।
नेपाल प्रहरीको केन्द्रीय अनुसन्धान ब्यूरो (सीआइबी ) बाट झापा ट्राफिक प्रमुखको नेतृत्व गर्न आएका न्यौपानेले शान्ति सुरक्षा र ट्राफिक व्यवस्थापनको कार्यमा सक्रिय भएर काम गर्ने प्रतिबद्धता जनाएका छन् ।
साथै बिर्तामोडका युवा व्यवसायी प्रलाद अधिकारी, निर्मल खत्री, पदम श्रेष्ठ लगायतले पनि ज्ञवालीको बिदाई तथा न्यौपानेलाई स्वागत गरेका थिए ।
जिल्ला ट्राफिक प्रहरी कार्यालय झापाका प्रहरी नायब निरीक्षक जिवन कार्कीले सञ्चालन गरेको कार्यक्रममा ट्राफिक प्रमुख ज्ञवालीले न्यौपानेलाई स्वागत सहित सफल कार्यकालको शुभकामना ब्यक्त गरेका थिए ।
