बाह्रदशी : झापाको बाह्रदशी ५ घोडामारा चोक नजिकै मोटरसाइकल दुर्घटनामा परी एक ब्यक्तिको मृत्यु भएको छ । आज बिहिबार बिहान ११ बजेतिर चारपानेबाट दक्षिण गइरहेको मे ८प ३५६९ को मोटरसाइकल घोडामारा नजिकै दुर्घटनामा परेको हो ।
दुर्घटनामा परी मोटरसाइकल चालक बाह्रदशी–५ घोडामाराका २२ वर्षिय सनम हेमरमको मृत्यु भएको जिल्ला ट्राफिक प्रहरी कार्यालय झापाले जनाएको छ ।
पैदलयात्री स्थानीय ४५ बर्षीया मनि मर्डीलाई मोटरसाइकलले ठक्कर दिँदा मोटरसाइकल चालक हेमरमसहित तीनजना घाइते भएका थिए । घाइते चालक हेमरमलाई उपचारका लागि बिर्तासिटी अस्पताल पुर्याउनासाथ चिकित्सकले मृत घोषणा गरेका थिए ।
त्यस्तै दुर्घटनामा पैदलयात्री मर्डी घाइते भएकी छन् । उनको छाती र दाहिने खुट्टामा चोट लागेको छ । त्यस्तै मोटरसाइकलको पछाडि सवार बिर्तामोड ३ बस्ने २३ वर्षिय समिर महमद पनि घाइते भएका छन् । उनीहरुलाई उपचारका लागि बिर्तासिटी हस्पिटल लगिएको थियो ।
पैदलयात्रीलाई प्रादेशिक अस्पताल भद्रपुर पठाइएको छ । मोटरसाइकलको पछाडी सवार महमद उपचारपश्चात् डिस्चार्ज भएर घर गएको जनाइएको छ ।
