बिर्तामोड : नेपाल मधेसी समाज सेवा समितिले आज सोमबार मकर संक्रान्तिका अवसरमा बिर्ताबजारमा खिचडी प्रसाद वितरण गरेको छ ।
बिर्ताबजार स्थित दुर्गा मन्दिरअगाडि समितिले एक कार्यक्रमकाबिच खिचडी प्रसाद वितरण गरेको हो । सामाजिक उत्तरदायित्व अन्तरर्गत करीब ६ सय जनालाई निशुल्क खिचडी वितरण गरिएको समितिका अध्यक्ष रामेश्वर मण्डलले जानकारी दिए । उनले लगातार तीन बर्षदेखि यस्तो कार्यक्रम गरिंदै आएको जानकारी दिए ।
साथै समितिले विपन्नलाई निशुल्क कपडा समेत वितरण गरेको छ । बच्चाहरुको ५० थान, ठुलो ब्यक्तिहरुकोलागि २५ थान ज्याकेट तथा ब्लाङ्केट २० थान वितरण गरिएको अध्यक्ष मण्डलले बताए ।
समितिलाई वितरण गरिएको कपडा छठ महिला मञ्च, अन्तलाल महत्तो र शत्रुधन रौनियारले उपलब्ध गराएको अध्यक्ष मण्डलले जानकारी दिए ।
खिचडी तथा निशुल्क कपडा वितरण कार्यक्रममा समितिका सह–सचिव प्रकाश महत्तो, सदस्य मोहनकुमार झा, बरिष्ठ सल्लहाकार दिलिप सिंह लगायतको उपस्थिति रहेको थियो ।
समितिका अध्यक्ष मण्डलको अध्यक्षता तथा बिर्तामोड नगर प्रमुख पवित्रा महत्तरा प्रसाईको प्रमुख आतिथ्यमा भएको कार्यक्रमको विशिष्ट अतिथिमा बिर्तामोड– ३ का निवर्तमान वडाध्यक्ष भोजराज सिटौला रहेका थिए ।
कार्यक्रममा बिर्तामोड– ६ का वडाध्यक्ष सूर्यप्रसाद कन्दङ्वा, बिर्तामोड नगरपालिकाका अधिकृत मेघराज बास्तोला , नेपाल रेडक्रस सोसाइटी उपशाखा बिर्तामोडका निवर्तमान सभापति सजेश शिवाकोटीलगायतको सहभागिता रहेको थियो । कार्यक्रमको संचालन आयोजक समितिकी प्रवक्ता निशा कर्ण मण्डलले गरेकी थिइन् ।
त्यस्तै एक सातादेखि मधेसी समाज सेवा समितिले कपडा बैंक सञ्चालन गरिरहेको छ । अबको केहिदिन विपन्नकालागि
बिर्ताबजारमै कपडा बैंक संचालन गरिने समितिका अध्यक्ष मण्डलले बताए । त्यसैगरी मृगौला पीडित समुद्र माझी बचाउनकालागि सहयोग संकलन समेत अभियान चलाएको थियो ।
