बिर्तामोड : नेपाल आइडल सिजन–५ को टप ९ मा पर्न सफल झापाली चेली इशा सुवदीलाई भोट गर्न अपिल गरिएको छ ।
झापाको बिर्तामोडमा आज आयोजित पत्रकार भेटघाटमा ‘इशा सुवेदी जिताऔं अभियान’ले भोट गर्न सबैमा अपिल गरेको हो ।
अभियानका संयोजक तथा गायिका सुवेदीका दाजु बिराज सुवेदीले सानैदेखि गीत–संगीतप्रति रुचि राख्ने इशालाई भोट गरी नेपाल आइडल सिजन ५ को बिजेता बनाउन अनुरोध गरे ।
प्रतियोगिता जित्न कलासँगै भोटको पनि उत्तिकै आवश्यक पर्ने भएकाले देश–विदेशमा रहेका सम्पूर्ण नेपाली तथा गीतसंगीत प्रेमीहरुलाई भोट गर्न अपिल गरे ।
यस्तै, कार्यक्रममा बिर्तामोड क्षेत्रका युवा तथा संगीतकार प्रकाश लिङ्देनले गायन क्षेत्रमा राम्रो सम्भावना बोकेकी इशालाई नेपाल आइडलमा जिताएर कला क्षेत्रमा स्थापित गर्नुपर्नेमा जोड दिए । कोशी प्रदेशबाट एक मात्र प्रतियोगी इशालाई जिताउन सबैको साथ सहयोग आवश्यक रहेकाले भोट गर्न उनले अपिल गरे ।
यस्तै, सनलाइट म्युजिक विद्यालयकी सञ्चालिका हेमा भण्डारी योञ्जनले गायन क्षेत्रमा इशाले राम्रो सम्भावना बोकेकी बताइन् । ‘गायन क्षत्रेमा इशाको क्षमता र योग्यता धेरै छ’, उनले भनिन्, ‘उनलाई जिताउन हामी सबै लाग्नुपर्छ ।’
संगीतप्रति रुचि र लगाब भएकी इशाले सनलाइटमा लामो समयदेखि साधना गर्दै आएको बताउँदै उनले इशालाई कला क्षेत्रमा स्थापित गराउन पनि नेपाल आइडलको सिजन ५ मा जिताउनुको विकल्प नभएको बताइन् ।
सामान्य परिवारकी बिर्तामोड निवासी इशा स्नातक तहकी विद्यार्थी हुन् । सानैदेखि गीत गाउन रुची राख्ने इशाले यही क्षेत्रमा स्थापित हुने सोच बनाएकी छन् । उनलाई जिताउन इशा सेवदी जिताउन १५ सदस्यीय समिति गठन गरिएको छ । उक्त समितिले प्रचार–प्रसार र भोटिङका लागि अपिलसँगै गीत–संगीत प्रेमीसँग स्वेच्छिक आर्थिक सहयोगसमेत सकंलन गरिरहेको छ ।
इशालाई भोट गर्न ई–सेवा, मोबाइल एसएमएस र मोःमोः एपबाट भोट गर्न सकिन्छ । ई–सेवाको नेपाल आइडल सिजन–५ मा गएर भोटिङ आइडी ०२ कोडमा भोटिङ गर्न सकिन्छ भने एसएमएसमार्फत ०२ टाइप गरी ३७००० पठाएर पनि भोट गर्न सकिन्छ ।
