मेचीनगर : इलाका प्रहरी कार्यालय काँकरभिट्टाले राजश्व छलेको आशंकामा ५३ बोरा सुपारीसहित एउटा पिकअप भेन नियन्त्रणमा लिएको छ ।
नेपालमा उत्पादित उसिनेको २ हजार ३७८ किलो सुपारीसहित प्रदेश १–०१–००१ च ७१२५ नम्बरको पिकअप गाडी नियन्त्रणामा लिइएको जिल्ला प्रहरी कार्यालय झापाका डिएसपी कृष्णकुमार चन्दले बताए । उनका अनुसार प्रहरीले पिकअपका चालक बुद्धशान्ति ३ बस्ने ४१ वर्षीय युवराज उप्रेतीलाई पनि नियन्त्रणमा लिएको छ ।
आज दिउँसो १ः४० बजेको समयमा मेचीनगर ६ भट्टराईचोकमा राजश्व छली नेपालमा उत्पादित सुपारी ओसारपसार भइरहेको भन्ने गोप्य सूचनाको आधारमा सुपारी नियन्त्रणमा लिइएको इलाका प्रहरी कार्यालय कांकरभिट्टाका डिएसपी मिमबहादुर लामाले जानकारी दिए ।
इलाका प्रहरी कार्यालय काँकरभिट्टाका प्रहरी नायव उपरीक्षक लामाको कमाण्डमा खटिएको प्रहरी टोलीले इटाभट्टाबाट काँकरभिट्टातर्फ आउँदै गरेको पिकअप गाडीलाई शंका लागेर जाँच गरेको थियो ।
त्यसक्रममा उक्त गाडीमा भिसिटिएस पानबिलमा १२ लाख २५ हजार रुपैयाँबराबरको बिल भए पनि आधिकारिक भिसिटिएस अनलाइन बिल थिएन ।
नियन्त्रणमा लिइएको सुपारीसहित गाडी र गाडी चालकलाई कारबाहीको लागि राजश्व अनुसन्धान कार्यालय इटहरी पठाइएको जिल्ला प्रहरी कार्यालय झापाले जनाएको छ ।
