जिल्ला ट्राफिक प्रहरी कार्यालय झापाका प्रहरी निरीक्षक नवराज न्यौपानेलाई तीन दर्जन भन्दा धेरै संघ संस्थाले एकै पटक सम्मान सहित विदाई गरेका छन् ।
आज बिर्तामोड उद्योग वाणिज्य संघको सभा हलमा एक कार्यक्रमकाबिच संघको अगुवाइमा जिल्लामा रहेका तीन दर्जन भन्दा धेरै संघ संस्थाले संयुक्त रुपमा प्रहरी निरीक्षक न्यौपानेलाई सम्मान सहित विदाई गरेका हुन् ।
न्यौपानेलाई विभिन्न संघ संस्थाका प्रमुख र प्रतिनिधिले सम्मान पत्र प्रदान गर्दै संयुक्त रुपमा विदाई गरेका थिए । बिर्तामोड उद्योग वाणिज्य संघका अध्यक्ष राजु न्यौपानेको अध्यक्षमा भएको कार्यक्रममा संघका विशिष्ठ सदस्य निर्मल भट्टराईले स्वागत गरेका थिए ।
कार्यक्रममा संघ संस्थाको तर्फबाट वीरता लेडी जेसीजकी पूर्व अध्यक्ष संगीता चिमरिया, राष्ट्रिय उपभोक्ता मञ्च झापा अध्यक्ष मदन गोपाल सुब्बा लगायतले शुभकामना मन्तव्य राखेका थिए ।
प्रहरी निरीक्षक न्यौपानेको सम्मानपत्र बाचन रामधुनी उर्जाशील आमा समूहकी अध्यक्ष गंगा शिवाकोटी ढकालले गरेकी थिइन् भने कार्यक्रमको सञ्चालन संघका महासचिव कुशल खतिवडाले गरेका थिए ।
प्रहरी निरीक्षक न्यौपानेको नेपाल प्रहरी विपद् व्यवस्थापन कार्यालय तालिम शाखा सामाखुसी काठमाडौं सरुवा भएको हो ।
न्यौपानेको सरुवासँंगै जिल्ला ट्राफिक प्रहरी कार्यालय झापामा गणेश पौडेल आउने भएका छन् ।
