झापा।
झापाको बुद्धशान्ति गाउँपालिका २ का वडाध्यक्ष डिल्लीप्रसाद ओली निलम्बित भएका छन् । भारतीय नागरिकसँग घुस लिँदालिँदै रङ्गेहात पक्राउ परेका ओली निलम्बनमा परेका हुन् ।
अख्तियार दुरुपयोग अनुसन्धान आयोग इटहरीले विशेष अदालतमा मुद्दा दर्ता गरेसँगै ओलीलाई निलम्बन गरिएको जानकारी पत्र पठाएको छ । वडा अध्यक्ष ओलीले असोज ८ गते बिर्तामोडमा भारतीय नागरिक अमरनाथ चौहानसँग ८० हजार घुस लिँदै गर्दा पक्राउ परेका थिए ।
अख्तियार दुरुपयोग अनुसन्धान आयोग ऐन २०४८ को दफा १६ को उपदफा ४० बमोजिम विशेष अदालत काठमाडौंबाट म्याद थप भई आएको र थुनामा रहेका ओलीलाई थप अनुसन्धान भइरहेको आयोगका अनुसन्धान अधिकृत ज्ञानमञ्जरी शर्माद्वारा हस्ताक्षरित पत्रमा उल्लेख छ ।
सार्वजनिक पद धारण गरेका व्यक्ति अख्तियार दुरुपयोग अनुसन्धान आयोग ऐन २०४८ को दफा १७ तथा भ्रष्टाचार निवारण ऐन २०५९ को दफा ३३ बमोजिम स्वतः निलम्बनमा रहने कानूनी प्रावधान छ ।
