झापाको विर्तामोड १ स्थित विर्तामोड आई हस्पिटलमा दाँतको सेवा सुरु भएको छ । बिर्तामोड आई हस्पिटल , नेशनल एडभान्स डेन्टल केयर र एडभान्स प्याथोलोजीको संयुक्त व्यवसायी साझेदारीमा आइतबारदेखि दाँतको सेवा सुरु गरिएको हो ।
काठमाडौंको लाजिम्पाटमा १८ वर्षदेखि सफलतापूर्वक सञ्चालित एडभान्स डेन्टल केयरले पहिलो ‘फ्रेन्चाइजी’का रुपमा विर्तामोडमा सेवा सुरु गरेको जनाइएको छ ।
डा. समीर अर्याल र डा. ज्योति अर्याल दम्पत्तीले काठमाडौंको क्लिनिकबाट गुणस्तरीय सेवा दिइरहेकाले मोफसलका सेवाग्राहीको सुविधाको लागि झापामा ‘फ्रेन्चाइजी’ सुरु गरिएको बताए ।
दाँत उपचारका लागि बजारमा धेरैवटा क्लिनिक सञ्चालनमा रहेको भए तापनि प्राविधिक रुपमा सुविधासम्पन्न पहिलो डेन्टल क्लिनिक नेशनल एडभान्स डेन्टल केयर बिर्तामोड रहेको उनीहरुको भनाई छ ।
प्राकृतिक दाँतको सुरक्षा र संरक्षणलाई प्राथमिकतामा राखेर उपचार दिइने डाक्टर अर्यालले बताइन् ।
उक्त डेन्टलको एक कार्यक्रमकाबिच पूर्व अर्थसचिव, राष्ट्रिय योजना आयोगका पूर्व सदस्य, पूर्वराष्ट्रपति डा. रामबरण यादवका आर्थिक सल्लाहकार शम्भु शरणप्रसाद कायस्थले उद्घाटन गरेका थिए ।
क्लिनिकमा डा. अर्याल दम्पती, डा. आरती झालगायत ६ जनाको चिकित्सक–प्राविधिकको टोलीले सेवा प्रदान गर्ने हस्पिटलका नेत्र विशेषज्ञ तथा व्यवस्थापक विनोद दाहालले जानकारी दिए । आइतबार पहिलो दिन नै उल्लेख्य संख्यामा दाँतको परीक्षण तथा उपचार गरिएको पनि दाहालले बताए ।
डाक्टर सीमा प्रधानले आँखा उपचारका लागि आउने बिरामीको माग र आवश्यकतालाई ध्यानमा राखेर दन्त चिकित्सा सेवा सुरु गरिएको र आगामी दिनमा कानको उपचार सेवा पनि उपलब्ध गराउने लक्ष्य राखिएको बताउँछिन् ।
