झापा । झापाको भद्रपुरमा मंगलबार साँझ सकारात्मक जीवन जिउने विविध कला र क्रियाकलापका बारे प्रवचनसहितको आध्यात्मिक तथा ध्यान शिविर गरिएको छ ।
भद्रपुर मारवाडी संघ, भद्रपुर मारवाडी युवा मञ्च र भद्रपुर मारवाडी महिला मञ्चको संयुक्त आयोजनामा भारतकी चर्चित सामाजिक अभियन्ता, सफल जीवन जिउने कलाकी मार्गदर्शक मोनिका सिंघलको सहजीकरणमा शिविर सञ्चालन गरिएको हो ।
भद्रपुर–६ स्थित होटल सिटी गार्डनमा आयोजित शिविरमा भारतको चण्डीगढमा स्थापित हरि ओम् स्माइल्सकी संस्थापक मोनिका सिंघलले प्रवचन तथा विभिन्न क्रियाकलापका साथ सहभागीहरुलाई सकारात्मक तथा निरोगी जीवन जिउने कला सिकाएकी थिइन् ।
भद्रपुर नगरपालिकाका प्रमुख गणेश पोखरेल, उपप्रमुख राधा कार्की, जिल्लास्थित प्रशासनिक तथा सरकारी निकायका उच्चपदस्थ अधिकारीलगायत भद्रपुरवासीको उल्लेख्य सहभागिता रहेको शिविरमा प्रस्तोता सिंघले प्रकृतिप्रदत्त पृथ्वी, जल, वायु आकाश र अग्निका तत्वहरुको समुचित उपयोगले स्वस्थ र समृद्ध जीवन जिउन सकिने बताइन् । उनले ध्यानबाट, हाँसोबाट, नियमित व्यायामहरुबाट तनावमुक्त जीवन जिउन सकिने मात्र नभई घातक रोगहरुलाई पनि जित्न सकिने बताइन् ।
_1736908732.jpg)
नेपालमा पहिलोपटक आफ्नो प्रस्तुति दिएकी सिंघलले आफ्नो अभियानले धेरैलाई असाध्य रोगहरुबाट समेत मुक्त गर्न सकेको उल्लेख गरिन् ।
हरि ओम् स्माइल्सले एक दशकभन्दा बढी समयदेखि ध्यान, आत्म–साक्षात्कार र सकारात्मक जीवनशैलीसम्बन्धी विभिन्न कार्यक्रम सञ्चालन गर्दै आएको छ । सिंघलले आज विर्तामोडमा पनि कार्यक्रम गर्ने उनलाई नेपालमा ल्याउन सहजीकरण गरेका सुरेशकुमार मित्तलले जानकारी दिए ।
कार्यक्रममा सिंघललाई भद्रपुर मारवाडी संघ, भद्रपुर मारवाडी युवा संघ र भद्रपुर मारवाडी महिला मञ्चको तर्फबाट सामुहिक रुपमा मायाको चिनो प्रदान गरिएको थियो ।
