_1741321068.jpg)
सन्तोष न्यौपाने÷झापा
आर्थिक अभावका कारण विपन्न मुस्लिम समुदायका बालबालिकाहरु अध्ययनरत झापाको बिर्तामोड ३ स्थित बिर्ताबजारमा सञ्चालित मदरसा तालिमुल कुरान आधारभूत विद्यालयको भवन निर्माण र जग्गा खरिद प्रक्रियामा समस्या उत्पन्न भएको छ ।
स्थानीय, प्रदेश र संघीय सरकारको आर्थिक सहयोगले घेरबारा र भवन निर्माण शुरु गरेको विद्यालयले आर्थिक अभावकै कारण पूरा जग्गा खरिद गर्न र भवन निर्माण गर्न सकेको छैन ।
बिर्तामोड–३ समावेशी टोलमा विद्यालय भवन निर्माणका लागि एक कठ्ठा ११ धुर जग्गा खरीद गरिसकिए पनि थप दुई कट्ठा तीन धुर जग्गा खरीदका लागि आर्थिक संकलनमा विद्यालय जुटेको हो ।
_1736908732.jpg)
विद्यालय निर्माणका लागि चार कठ्ठा जग्गा खरीद गरिने छ भने जग्गा खरीद गरेको व्यक्तिबाट पाँच धुर जग्गा सहयोगस्वरुप प्राप्त भएको विद्यालय व्यवस्थापन समितिका अध्यक्ष अफरोज खानले जानकारी दिए ।
जग्गा धनी स्थानीय कैलाश प्रसाईंले बिक्रीनामा बनाएर विद्यालयलाई ४ कठ्ठा जग्गा उपलब्ध गराए पछि विद्यालय भवन पनि बनाइँदैछ ।
५ धुर जमिन प्रसाईंले नै विद्यालयलाई दान दिएको, १ कठ्ठा ११ धुर जमिन विद्यालयको नाममा रजिष्ट्रेशन पास भइसकेको र बाँकी जमिनको रकम भुक्तानी गर्न अप्ठ्यारो परेको विद्यालयले जनाएको छ ।
शिक्षक र कर्मचारीहरु सबैजना महिलामात्र रहेको सो विद्यालयमा मुस्लिम समुदायका महिलाहरुले धर्म विरुद्धको क्रान्ति गर्दै शिक्षण पेसा अपनाइरहेको बताइएको छ ।
कक्षा ६ सम्म सञ्चालित सो विद्यालयमा गैर मुस्लिम समुदायका ६ जनासहित १५४ जना बालबालिकाहरु अध्ययनरत रहेका छन् । हाल बिर्ताबजारस्थित मस्जिदमा विद्यालय सञ्चालन भइरहेकाले सरकार र समुदायको सहयोग लिएर फराकिलो स्थानमा सार्न भवन निर्माण प्रक्रिया अगाडि बढाइएको जनाइएको छ ।
मदरसाले सञ्चालन गरेको सो विद्यालयमा बाल विकासदेखि कक्षा ६ सम्म उर्दु, अरेबिक, अंग्रेजीसहित नेपाल सरकारले तोकेका पाठ्यक्रम अनुसार कक्षा सञ्चालन गर्दै आएको छ ।
विद्यालयको नाममा पास गर्न बाँकी २ कठ्ठा ९ धुर जग्गा खरिदका लागि ७० लाख रुपैयाँ आवश्यक रहेको र त्यसका लागि समाजसेवी, शिक्षा प्रेमी देश तथा विदेशमा रहेका दाताहरुसँग मुष्ठिदानको अपेक्षा गरेको हो । सहयोग गर्न चाहने दाताहरुले एनआईसी एशिया बैंक बिर्ताबजारमा रहेको खाता नम्बर ४६४१५०१०८८४२००२ मा सहयोग गर्न सकिने बताइएको छ ।
मदरसा बिद्यालयले धार्मिक तथा सामाजिक कार्यलाई निरन्तरता दिने, मदरसामा कक्षा थप गरी कक्षा १२ सम्म अध्यापन गराउने, बिद्यालयमा छात्रावासको ब्यवस्था गर्ने, निःशुल्क शिक्षा दिने ब्यवस्था गर्ने, मदरसा बिद्यालयमा बिद्यार्थीहरुलाई पठनपाठनका लागि अभिभावकलाई प्रेरित गर्ने लगायतका योजना अघि सारेको छ ।
स्थानीय जनप्रतिनिधि बिर्तामोड ३ का वडाध्यक्ष मदन बुढाथोकीले पनि सक्ने सहयोग गर्दै आएको र आगामी दिनमा पनि निरन्तरता दिने बताउँदै मुस्लिम, सन्थाल समुदायका बालबालिका अझैपनि बिद्यालयको पहुंचबाट टाढा रहेको बताउंदै मदरसा बिद्यालयले त्यस्ता समुदायमा चेतना जगाउँदै अभिभावकलाई प्रोत्साहन गराउनु पर्नेमा जोड दिएको छ ।
विद्यालयको निर्माणधिन भवन र बाँकी रहेको जग्गा खरिद गर्न अनुमानित एक करोड ७० लाख रुपैयाँ खर्च हुने भएकाले सबैले सहयोग गरिदिन विद्यालयले आग्रह गरेको छ । एभिन्यूजखबरकालागि झापाबाट सन्तोष न्यौपानेको रिपोट ।
