बिर्तामोड । राष्ट्रिय युवा सङ्घका केन्द्रीय सदस्य तथा झापा इन्चार्ज खगेन्द्रराज आङदेम्बेमाथि खुकुरी प्रहार गर्ने दुर्गा राई पक्राउ परेका छन् । प्रहरी स्रोतका अनुसार राईलाई  दुधेबाट हिजो बेलुका प्रक्राउ गरेको जनाएको छ । 

मङ्गलबार मध्यरातमा भएको घटना पछि राई फरार रहेका थिए । राई घटनाको मुख्य अभियुक्त भएको प्रहरीले जनाएको छ ।   मङ्गलबार मध्यराति १२ . ४५ बजे बिर्तामोड ४ भद्रपुर रोड पश्चिम कर्णाली सहकारीको नजीकै घटना भएको थियो । 

गणेश प्रसाईको घरमा डेरा गरी बस्दै आएका पाँचथर घर भएका खगेन्द्र खालिङ राईलाई  भने प्रहरीले घटनाको भोलीपल्ट पक्राउ गरिसकेको छ । प्रक्राउ परेका दुर्गा उनकै भतिजा हुन् । उनलाई पाँच दिनको म्याद थप गरि अनुसन्धान भइरहेको प्रहरीले जनाएको छ ।

घटनामा आङदम्बे सहित  एमालेका बिर्तामोड नगर कमिटी सदस्य वडा नम्बर ९ बस्ने बर्ष अन्दाजी ३५ का विश्वदीप राजवंशी र एमालेकै कार्यकर्ता वडा नं ४ बस्ने वर्ष अन्दाजी ३० का अजय खवास घाइते भएका थिए ।

यता घाइते आङदम्बेको बिएण्डसीमा उपचार भइरहेको छ । उनको आइसियु कक्षमा उपचार पश्चात हाल क्याविन उपचार भइरहेको छ । उनी खत्तरामुक्त रहेको प्रहरीले जनाएको छ ।