झापा : झापाको भद्रपुर स्थित भूमिसुधार तथा मालपोत कार्यालय भद्रपुरले चालु आर्थिक वर्षको ८  महिनाको अवधिमा रु ४५ करोड ९३ लाख ६३ हजार ९ सय ५ रुपैंया राजस्व संकलन गरेको छ ।

भूमिसुधार तथा मालपोत कार्यालयका प्रमुख मालपोत अधिकृत राजेशप्रसाद पोखरेलका अनुसार ८ महिनाको अवधिमा १७ हजार पाँच सय ६९ राजिनामा ÷ लिखत  पारित हुंदा सो राजश्व संकलन भएको हो । 

राजिनामा ÷लिखत पारितबाट ४२ करोड ३७ लाख ७७ हजार १ सय ५० रुपैंया संकलन भएको छ । 

यसैगरी, मृत्युपछिको नामसारी पाँच सय ६७, घर कायम पाँच सय ८७, हाल साबिक अद्यावधिक नौ सय ८९, दाखिला खारेज एक सय ७१, संशोधन नौ सय १४, मोही बाँडफाँट ११, मोही नामसारी नौ र तीन सय ७० जनाको मोही लगत कट्टा भएको कार्यालयको तथ्याङ्कमा उल्लेख छ । 

मुद्धाफांट पुंजीगत लाभकरबाट १ करोड ४६ लाख ७५ हजार ७ सय ५४ रुपैंया , पुंजीगत लाभकर माघ मसान्तसम्मा १५ करोड ६८ लाख ७० हजार ९ सय ८० रुपैंया, अग्रिम आयकर ९० लाख २६ हजार ४ सय ९७ रुपैंया संकलन भएको छ । यो संकलित रकम संघको खातामा जम्मा हुने बताइएको छ । 

आर्थिक मन्दीका कारण घरजग्गा कारोबारमा उल्लेखनीय वृद्धि हुन नसक्दा त्यसको असर राजस्व संकलनमा परेको कार्यालयका सुचना अधिकारी राजु दाहलले बताए । 

उक्त कार्यालयले आव २०८०÷८१ मा रु ८० करोड ५८ लाख १४ हजार पाँच सय ९२ राजस्व संकलन गर्दा ३६ हजार आठ सय ७५ थान रजिष्ट्रेसन पारित भएको थियो ।