_1741321068.jpg)
काठमाडौं । काठमाडौँको तीनकुनेमा राजतन्त्र समर्थकहरुको प्रदर्शनका क्रममा प्रहरी र प्रदर्शनकारीबीच झडप हुँदा एक जनाको मृत्यु भएको छ ।
प्रहरीको गोली लागि घाइते भएका कीर्तिपुरका २९ वर्षीय सविन महर्जनको उपचारका क्रममा त्रिवि शिक्षण अस्पतालमा मृत्यु भएको हो । प्रहरीको गोली लागि घाइते भएका ३ जनाको ट्रमा सेन्टरमा उपचार भइरहेको छ । घाइते हुनेमा दिल्ली प्रसाद लुइँटेल, गणेश तामाङ र श्याम दर्जी रहेका छन् ।
तीनकुने क्षेत्रमा राजतन्त्र समर्थकहरुले निषेधित क्षेत्र तोड्न खोजेपछि प्रहरीले बल प्रयोग गरेको थियो । सो क्रममा प्रहरीले अश्रुग्यास र पानीको फोहोरा प्रहार गरेको थियो । प्रदर्शनकारीले प्रहरीमाथि ढुंगामुढा गर्नुका साथै निजी घरमा तोडफोड र आगजनी समेत गरेका थिए । प्रदर्शनकारीले आगलागी नियन्त्रणका लागि गएको दमकलमाथि समेत आक्रमण गरेपछि प्रहरीले हवाई फायर गरेको हो ।
प्रदर्शनकारीहरुले नेकपा एकीकृत समाजवादीको आलोकनगरमा रहेको कार्यालय, कोटेश्वर भाटभटेनी, सिनामंगलस्थित नागरिक उड्डयन कार्यालय पनि तोडफोड गरेका छन् । तीनकुनेमा राजवादीहरुले गणतन्त्र खारेज र राजसंस्था पुनस्र्थापनाको माग सहित आज सभा आयोजना गरेका थिए । तर, प्रहरीसँगको झडपपछि कार्यक्रम नै बिथोलिएको छ ।
