_1741321068.jpg)
काठमाडौं । राजधानीको तीनकुनेमा राजावादी समर्थकले एभिन्यूजकर्मी सुरेश रजकको जिउँदै जलाएर हत्या गरिएको घटनामा एभिन्यूज टेलिभिजन परिवार र मृतक पत्रकार रजकको परिवारले संयुक्त रूपमा सरकार समक्ष तीन बुँदे माग राखेको छ ।
सो माग गृहमन्त्री रमेश लेखकलाई बुझाइएको छ । एभिन्यूजकर्मी रजक हत्या घटनाबारे जानकारी लिन एभिन्यूजको कार्यालयमा उपस्थित भएका गृहमन्त्री लेखकलाई मृतक पत्रकारको परिवार र एभिन्यूजका तर्फबाट तीन बुँदे मागपत्र बुझाइएको हो ।
एभिन्यूज खबर र मृतक पत्रकारको परिवारले एभिन्यूजकर्मी रजकलाई निरपेक्ष रूपमा शहीद घोषणा गर्नुपर्ने माग गरेको छ । उच्चस्तरीय समिति गठन गरेर तीन दिन भित्र घटनाको छानबिन गरी दोषीलाई कारबाही गर्नुपर्ने मृतक पत्रकारको परिवार र एभिन्यूज खबरको माग थियो ।
गृहमन्त्री लेखकसँग मृतक पत्रकार रजकको परिवार र एभिन्यूज खबरले उचित क्षतिपूर्ति दिनुपर्ने माग पनि गरेको हो । चैत्र १५ गते तीनकुनेमा राजावादी समर्थक प्रदर्शनकारीले आगजनी गरेको भवनमा जलेर एभिन्यूजकर्मी रजकको निधन भएको हो ।
_1736908732.jpg)
तीनकुनेमा एभिन्यूजकर्मी रजको हत्या भएको घटनाप्रति दुख व्यक्त गर्दै गृहमन्त्री लेखकले उक्त घटनालाई आपराधिकको संज्ञा दिए । साथै मन्त्री लेखकले एभिन्यूज र मृतक पत्रकार रजकको परिवारले राखेको माग प्रधानमन्त्रीसँग छलफल गरेर निर्णय लिने प्रतिबद्धता व्यक्त गरे । उनले घटनाबारे छानबिन हुने पनि बताए ।
