काठमाडौं  :  आगोमा जलेर मृत्यु भएका एभिन्यूज टेलिभिजनका पत्रकार सुरेश रजकको अहिले सम्म पोष्टमार्टम हुन सकेको छैन । 

तीनकुनेमा भएको राजावादी प्रदर्शनमा मारिएका रजकको शव  पोस्टमार्टमका लागि त्रिवि शिक्षण अस्पतालमा पठाइए पनि अहिलेसम्म पोस्टमार्टम हुन सकेको छैन । 

पोस्टमार्टममा संलग्न चिकित्सकले रजकको शरिरको पोर्टेबल एक्स–रे नगरी पोस्टमार्टम गर्न अस्वीकार गरेको स्रोतले बतायो ।

उनको शरीरमा गोली लागेको हल्लापछि एक्स–रे गर्न ढिलाइ भएको छ ।

‘राजावादी प्रदर्शनमा मृत्यु भएका दुई जनाकै शव पोस्टमार्टमका लागि पठाएका थियौं । एक जनाको पोस्टमार्टम भए पनि अर्को एक जना पत्रकारको भने पोस्टमार्टम हुन सकेको छैन’ परिसरका एक अधिकृतले भने, ‘गोली लागेको भन्ने हल्ला चलेपछि पोर्टबल एक्स–रे नगरी पोस्टमार्टम नगर्ने चिकित्सकको अडान छ ।’

पुरै शरीरको पोर्टेबल एक्स–रे गर्ने भनिए पनि त्रिवि शिक्षण अस्तालमा त्यस्तो एक्स–रे मेसिन नरहेकाले अन्यत्र बुझ्ने काम भइरहेको प्रहरीको भनाइ छ ।

‘प्रोटोकल अनुसार नै जलेको शरीरको एक्सरे गर्नुपर्ने हुन्छ । जसले मृत्युको कारण पत्ता लगाउन सहयोग गर्छ,’ विभाग एक चिकित्सकले भने, ‘ हामीसँग भएको एक्सरे मेसिन बिग्रिएकाले समय लागेको हो । ’

यसैगरी रजकको मृत्यु गोली लागेको भएको भन्ने बाहिर हल्ला आएको त्यसले विवाद निम्ताउनेसक्ने भएकाले एक्सरे गर्न लागिएको ती चिकित्सक बताउँछन् ।

‘हवाइ दुर्घटनामा परेका मानिसको पनि एक्सरे गरेमात्रै शवको पोस्टमार्टम गर्ने गरिएको छ,’ ती चिकित्सक भन्छन्, ‘अर्को एक्सरे मेसिनका लागि निर्देशकज्यूसँग भनेका छौं । व्यवस्थापन भइरहेको होला ।’

गोली लागे–नलागेको कुरा एक्सरेबाट मात्र थाहा हुने ती चिकित्सकले बताए । ‘शरीर पुरै जलेको अवस्थामा छ । त्यसकारण गोली लागेको थियो, थिएन भने देख्न गाह्रो पर्छ । त्यसकारण पनि एक्सरे गर्न लागेका हौं,’ ती चिकित्सक भन्छन् ।

फरेन्सिक विभागमा एक्सरे मेसिनको व्यवस्था हुनेबित्तिकै एक्सरे गरेर पोस्टमार्टमको प्रक्रिया अघि बढ्ने ती चिकित्सकले जानकारी दिए ।

केही मिडिया तथामा सामाजिक सञ्जालमा पत्रकार रजकलाई गोली लागेको भन्दै खबरहरु सार्वजनिक भएका थिए । त्यसपछि चिकित्सकले एक्स–रे नगरी पोस्टमार्टम नगर्ने बताएका हुन् । यता प्रहरीले भने विज्ञप्ती निकाल्दै भ्रामक खबरहरु फैलाइएको र त्यस्तो खबर फैलाएर कारबाहीसम्म गर्ने बताएको थियो ।

रजकसँगै पठाइएका सुरेश रजकको भने पोस्टमार्टम भइसकेको छ । प्रहरी स्रोतका अनुसार उनको दायाँ हातको कुहिने नजिकको भागबाट कोख हुँदै ढाडबाट गोली निस्केको पाइएको छ ।