सुरुङ्गा । 

झापाको कनकाई नगरपालिकाले नौ सय ५० जना अपाङ्गता भएका ब्यक्तिहरुलाई परिचयपत्र बितरण गरेको छ । कनकाई नगर, कोशी प्रदेश सरकार र करुणा फाउण्डेशन नेपालको त्रिपक्षिय साझेदारीमा समुदायमा आधारित अपाङ्गता रोकथाम तथा पुनः स्थापना कार्यक्रम अन्तरगत ९५० जनालाई अपाङ्गता परिचय पत्र बितरण गरिएको नगरले जनाएको छ । 

त्रिपक्षिय साझेदारीमा नगरमा सञ्चालित अपाङ्गता रोकथाम तथा पुनः स्थापना कार्यक्रम अन्तरगत अपाङ्गता भएकालाई चार भागमा बिभाजन गरी परिचय बितरण गरिएको शाखा प्रमुख हरि पौडेललाई उद्धृत गर्दै अपाङ्गता सहायक सहजकर्ता भीम सुन्दासले जानकारी दिए । उनका अनुसार यो समाचार तयार पार्दासम्ममा रातो परिचयपत्र २४३, निलो परिचयपत्र ३५३, पहेलो परिचयपत्र २५४ र सेतो परिचयपत्र १०० जनालाई बितारण गरिएको छ । 

अपाङ्गता रोकथाम तथा पुनः स्थापना कार्यक्रम अन्तरगत बिभिन्न कार्यक्रमलाई निरन्तरता दिइदै आएको नगरकी सहायक पाँचौ तह टीका खतिवडाले बताइन् । कार्यक्रम अन्तरगत अपाङ्गता गृह भेटघाट, स्वास्थ्य शिविर, पहिचानलगायतका कार्यक्रमलाई निरन्तरता दिदै हालसम्म चार भागमा बिभाजन गरी ९५० जनालाई परिचयपत्र बितरण गरिएको उनले बताइन् । 

अपाङ्गता भएका ब्यक्तिहरुको मिलिजुली समुह गठन गरी प्रत्येक महिना मासिक बचत जारी रहेको, शिक्षक र ब्यवस्थापन समितिलाई तालिम साथै अपाङ्गता भएका बालबालिकालाई शिक्षा भर्ना कार्यक्रम गरिएको सिबिआर सहजकर्ता चेतन आचार्यले जानकारी दिए । 

यसैगरी जन्मिने शिशुलाई अपाङ्गता हुन नदिन फोलिक एसिड चक्की बितरण, नव दम्पत्तीलाई शुभकामना कार्ड बितरण, प्रत्येक वडाका मिलिजुली समुहलाई बचत ऋण ब्यवस्थापन तथा नेतृत्व विकास सम्बन्धी तालिम, अपाङ्गता भएका ब्यक्तिका अभिभावकलाई हेरचाह सीप तालिमलगायतका कार्यक्रम सञ्चालन भइरहेका सिबिआर सहजकर्ता आचार्यले जानकारी दिए । 

सोही कार्यक्रम अन्तरगत २८ दिन माथि ५ बर्षमुनिका बालबालिकाहरुमा हुनसक्ने जन्मदोष अपाङ्गताको पहिचान र ब्यवस्थापन सम्बन्धी स्क्रीनीङ परिक्षण २०८१र१२र११ सोमवारबाट शुरु गरिएको उनले बताए ।