काठमाडौं । नेकपा एमालेको ११ औँ महाधिवेशनमा पदाधिकारी तहका नेताहरूको कित्ताकाट चलिरहेका बेला केपी शर्मा ओली र ईश्वर पोखरेल दुवैतिर प्रष्ट नखुलेका सात जना नेताले सामूहिक निर्णय गरेका छन् ।
ओली र पोखरेल दुवै नेताहरूसँग नियमित छलफलमा रहेका उनीहरूले शुक्रवारबाट ओलीलाई साथ दिने निष्कर्ष निकाले हुन् ।
छलफलमा सहभागी एक नेताका अनुसार सहमतिको प्रयास जारी राख्ने र अराजनीतिक तथा अस्वस्थ अभिव्यक्ति नदिन दुवै पक्षलाई आग्रह गर्ने सहमति पनि भएको छ ।
उपाध्यक्षद्वय रामबहादुर थापा र विष्णुप्रसाद पौडेल, उपमहासचिव पृथ्वीसुब्बा गुरूङ, सचिवहरू लेखराज भट्ट, रघुवीर महासेठ, छविलाल विश्वकर्मा र पद्मा अर्यालले मुलुकमा विद्यमान सङ्कटपूर्ण परिस्थितिलाई मध्यनजर गर्दै सुदृढ पार्टी एकताको पक्षमा योगदान गर्न सम्बद्ध सबैसँग आग्रह गरेका छन् ।
_1736908732.jpg)
साथै उनीहरूले पार्टीको एघारौँ राष्ट्रिय महाधिवेशनबाट अध्यक्ष केपी शर्मा ओलीको नेतृत्वमा राष्ट्रलाई सही ढङ्गले दिशा निर्देश गर्न सक्ने सक्षम केन्द्रीय कमिटी निर्माण गर्न योगदान गर्ने निष्कर्ष अधि सारेका छन् । ती नेताले अझै पनि पार्टीमा सहमतिका आधारमा नेतृत्व निर्माणको औचित्य र आवश्यकता कायमै रहेको समेत बताएका छन् । nepalpress.com
